Gagnaveita Reykjavíkur veitir framúrskarandi þjónustu

Fréttir
23.11.2017

Gagnaveita Reykjavíkur hlaut á dögunum tvenn verðlaun á stærstu háhraðaráðstefnu heims, fyrir þjónustuna Ein heimsókn. App sem smíðað er í OutSystems með aðstoð Advania, leikur stórt hlutverk í þjónustunni.
Ein heimsókn er þjónusta Ljósleiðarans sem felur í sér að starfsmaður Gagnaveitunnar græjar uppsetningu og ljósleiðarasamband með einni heimsókn á heimili notanda.

„Rafrænir ferlar eru gríðarlega mikilvægir í þjónustu Ljósleiðarans. Því fengum við aðstoð Advania við að gera sérstakt app fyrir starfsmenn okkar sem sjá um uppsetningar Ljósleiðarans í heimahúsum. Nú fá tæknimenn okkar pöntun beint í spjaldtölvuna um leið og fjarskiptafyrirtækið sendir hana. Fjarskiptafyrirtækið fær tilkynningu um leið og verki er lokið. Starfsmaður vistar myndir af frágangi í appinu og hann getur virkjað tengingu með einni skipun. Viðskiptavinur og fjarskiptafyrirtækið fá svo samantekt með myndum á PDF formi við verklok. Það er óhætt að segja að þessi frábæra vinna Advania við gerð appsins sé einn af lykilþáttum þessarar þjónustu,“ segir Valur Heiðar Sævarsson markaðsstjóri Gagnaveitu Reykjavíkur.

„Sú krafa að hugbúnaðarþróun taki stuttan tíma án þess að gæðum sé fórnað verður æ háværari. OutSystems þróunarumhverfi er einmitt svar við þessir kröfu, að geta verið snöggur að þróa lausnir án þess að draga úr kröfum um gæði. Hugbúnaðarþróun í þessu umhverfi tekur aðeins 20-25 % af tímanum við hefðbundna forritunarvinnu, hvort sem um er að ræða stærri kerfi eða svokölluð öpp,“ segir Gísli Ragnar Ragnarsson forstöðumaður sölu á hugbúnaðarlausnum Advania.


Til baka
Mynd með frétt